قصيدة >>> التايتنك<<<
ضاقت اوساع الفيافي و الوعد متنى السفينه
للطريق اللي دعاني بعد آمان الله وامانه
لا تناديني وصوني قلبك الله لا يهينه
لا يراهن في رجوعي لجل ما يخسر رهانه
ليه مرحل عن غرامك بعد ما ذقت الغبينه
إذكريلي شي واحد يستحق اقعد عشانه
قلب ما حن لوصالي ,, ماني بحاجه حنينه
وانا اشهد انه ما يعزل بالرفيع الا هوانه
الهوى الغدار حد الله ما بيني وبينه
و الرجل لا خير فيه ان ما حفظ قدره وصانه
واحد مثلي ليا من حدته عوجى سنينه
ما شكى لقرب بن آدم لو هو أغلا من خوانه
يوم قلبي ما عصاك وما رضيتي تذبحينه
ليه خنتي فيه وانتي معه من نفس الديانه
كان ذبحي بيدك ارحم لي من اللي تفعلينه
وان طلبتك تذبحيني ما ذبحتيني لعانه
كل جرح من جروحي تذكرينه تنكرينه
كن مالك في نزيفه يد خانت بالأمانه
ينزف الخافق تواضع لين لطختي جبينه
ولانا ما نت ابيها توصل الحد الإهانه
قلت من باب الميانه صاحبك وتعذبينه
لعن ابوك ارخي معاي اشوي ما صارت ميانه
طعت عقلك يوم قيل ان العقل في البنت زينه
لكن الشرها علي يوم كنت احسب انك تكانه
من بعد ما كنتي انتي في حشاي آغلا سجينه
بوعدك بطلق صراحك وأتهمني بالإدانه
وين رايح ؟؟ لي درب ما يوصل للمدينه
ليه رايح ؟؟ لن قلبك ما ترك قلبي وشانه
كيف ابنسى ,, ربي اللي ملهم القلب السكينه
مثل ما عانه بقربك لا نوى فرقاك عانه
كان قاسي .. يجرح أطراف السكاكين السنينه
ما يطيح وبنت مثلك حبها هزت كيانه
ولانا خابر خفوقي ما يمد الا الثمينه
وان بغا يغيض الثريا قعد القمره وزانه
مزعل لجلك هنوف رجت عقول رزينه
وإن تهادت في الطريق الجرهدي تزهر جنانه
جادلن كن الجمال إقبالها كتف ادينه
والقمر لو شتورتله ينزح وتقعد مكانه
كانت أول من تحكم في فروع الياسمينه
وان تعدتهن تثنن خيزرانه خيزرانه
بعتها لجلك وصارت لصغر أطرافك رهينه
ولهي لفتت هدبها تغمرك ثقل ورزانه
والخفوق اللي تغذى من معزة والدينه
مشكلته انه تعلق في زمن ماهو زمانه
كل مازادت جراحه واكتشف غلطه ضنينه
صدقيه ان قال مابه شخص يستاهل حنانه
يوم نادى يافلانه مارضيتي تسمعينه
لين صوت يافلانه يافلانه يافلانه
كنت اشوفك زعفرانه تقرض الورد وتدينه
يمكن اني ماقطفتك بس اشوفك زعفرانه
كنت اهاب البعد عنك واطلبك لاتذكرينه
كان خوفي من الفراق وخطوه الفرقا جبانه
ما اقتنعت ان الخيانه للرجل تلوي يمينه
لين ربي بعثك وذقت من طعم الخيانه
اسمحيلي مابقى فيني مكان تطعنينه
واقبلي من جوف قلبي كل عطفه وامتنانه
والله والله في عذابك بتركك عينك بعينه
دلّليه ومايردك من شفاك الالسانه
ولانا قررت اسافر وامتطي ظهر السفينه
لن مابه شي واحد يستحق اقعد عشانه
((((((( وسلامتكم .. )))))))) ((((( قصيدة الشاعر المبدع حـــــــــامـــــد زيــــــــد )))))